بعد ماتعرضت لحادث سير أشبه بالمعجزه الربانيه اللي أُنقذت روحي منه ،،، جتني مشاعر غريبه تعلمت منها ان كل شي ممكن يروح منك بغمضة عين ،، شفتهم سمعت الله وأكبر وحسيت بمجموعه كبيره من الناس في مقدمتهم ابووي واخواني وبعض من اقاربي واقفين يناظروني ويكبرون علي ثم رفعوا يدهم يدعون لي ماحسيت انه بينهم وقلت لنفسي يافلان ارتاح غمضت عيوني عن هالدنيا ولعلنا نلتقي بالجنه واقولك قد ايش كنت انتظرك بالدنيا واني باخر نفس ناديت بأسمك ونطقت الشهاده وتركت لهم جسد بدون روح رايحه من دنياكم مبتسمه راضيه مرتاحه واثقه ان فيه من بيدعي لي غيرهم اعرف ان فيه من بيتصدق عني مو منهم وأنت عايش حياتك ماتدري تحسب اني مكمله هالحياه ولو ناديت بسميتي وتذكرتني بتناظر للسماء وتقول الله يوفقها وانا روحي تسمعك وتبتسم لانك تذكرتني لو بدعوه دنيويه ،،، فتحت عيوني على شخص يقولي انتي بخير ياختي … مر قدامي شريط وصرخت من ألم بجسمي ماعرف وين وبكيت كأنها صرخة رجوعي للحياة وبعدها كان في داخلي الكثير من الحكي لناس في حياتي فكرت بالحكي من بيقوله لهم؟ وذيك المشاعر من بيوصلها لهم؟ من بيقولهم اني مانسيتهم لو نامت عيوني للأبد ذيك اللحظه لو مت .!من بيسأل عني ؟ من بيحظر نعشي من بيبكي علي .!!! من بيبوس راسي ويودعني .!!! منهم اللي بيشيلوني على اكتافهم لين ذيك المقابر ومن اللي بيرثيني بالشعر والقصايد .!!! ومن اللي بيبكي على موتي ويدعيلي .؟؟ ومن اللي ٣ ايام وناسيني .!! مالي اعداء بالحياة غير اللي يكرهوني وانا احبهم يا ترى بيعزون اهلي فيني ؟ بعد مرور هالاسئله في بالي وبغرفة الطوارئ بكيت كثيررر شهقات وونيين كانت نفسي تقول ليه تركت يدي ليه ليه كنت اقولك امسك يدي ولاتتركها ليه تركتها حاله غريبه ماعرفت نفسي فيها بس كنت ابيهم ينادونه ذيك اللحظه هو كان كل شي لي كنت ابي يجي ابي بأي لحظه يدخل علي بذيك الغرفه اللي على بابها الكثير ينتظرون مرضاهم وأنا كنت أنتظرك بالرغم اني اعرف ماراح تجي 👌🏻